อุทกํ สทฺทายตีติ ฯ
มยฺหมฺปิ ตาว มหาราช ตว ปุจฺฉิตพฺพํ อตฺถิ เอวเมโส ปญฺโห สุวินิจฺฉิโต
โหติ ฯ กินฺนุ โข มหาราช สพฺเพหิปิ ภาชเนหิ อุทกํ ตปฺปมานํ สทฺทายติ อุทาหุ
เอกจฺเจหิเยว ภาชเนหิ ตปฺปมานํ สทฺทายตีติ ฯ หิ ภนฺเต สพฺเพหิปิ ภาชเนหิ
อุทกํ ตปฺปมาณํ สทฺทายติ เอกจฺเจหิเยว ภาชเนหิ อุทกํ ตปฺปมานํ สทฺทายตีติ ฯ
เตนหิ มหาราช ชหิโตสิ สกสมยํ ปจฺจาคโตสิ มม วิสยํ นตฺถิ อุทเก ชีโว วา สตฺโต
วา ฯ ยทิ มหาราช สพฺเพหิปิ ภาชเนหิ อุทกํ ตปฺปมานํ สทฺทาเยยฺย ยุตฺตมิทํ อทุกํ
ชีวตีติ วุตฺตํ ฯ น หิ มหาราช อุทกํ ทฺวยํ โหติ ยํ สทฺทายติ ตํ ชีวติ ยํ
น สทฺทายติ ตํ น ชีวตีติ ฯ ยทิ มหาราช อุทกํ ชีเวยฺย มหนฺตานํ หตฺถินาคานํ
อุสฺสุกฺกายานํ ปภินฺนานํ โสณฺฑาย อุสฺสิญฺจิตฺวา มุเข ปกฺขิปิตฺวา กุจฺฉึ ปเวเสนฺตานํ
ตมฺปิ อุทกํ เตสํ ทนฺตนฺตเร ปีฬิยมานํ สทฺทาเยยฺย ฯ กตฺถสติกา มหานาวา
ครุกา ภาริกา อเนกสตสหฺสสภารปริปูรา มหาสมุทฺเท วิจรนฺติ ตาหิ ปีฬิยมานํ อุทกํ
สทฺทาเยยฺย ฯ มหติมหนฺตาปิ มจฺฉา อเนกสตโยชนิกกายา ติมี ติมิงฺคลา ติมิรปิงฺคลา
อพฺภนฺตเร นิมุคฺคา มหาสมุทฺเท นิวาสนตาย ปฏิวสนฺตา มหาอุทกธารา อาจมนฺติ ธมนฺติ
จ เตสมฺปิ ตํ ทนฺตนฺตเรปิ อุทรนฺตเรปิ ปีฬิยมานํ อทุกํ สทฺทาเยยฺย ฯ ยสฺมา จ
โข มหาราช เอวรูเปหิ เอวรูเปหิ มหนฺเตหิ มหนฺเตหิ ปฏิปีฬเนหิ ปฏิปีฬิตํ ตํ
อุทกํ น สทฺทาเยยฺย ตสฺมาปิ สตฺถิ อุทเก ชีโว วา สตฺโต วา วาติ เอวเมตํ
มหาราช ธาเรหีติ ฯ สาธุ ภนฺเต นาคเสน เทสนาคโต ปญฺโห อนุจฺฉวิกาย วิภตฺติยา
วิภตฺโต ฯ ยถา นาม ภนฺเต นาคเสน มหติมหคฺฆํ มณิรตนํ เฉกํ อาจริยํ กุสลํ
สิกฺขิตํ มณิการํ ปาปุณิตวา กิตฺตึ ลเภยฺย โถมนํ ปสํสํ มุตฺตารตนํ วา มุตฺติกํ ทุสฺสรตนํ
วา ทุสฺสิกํ โลหิตจนฺทนํ วา คนฺธิกํ ปาปุณิตฺวา กิตฺตึ ลเภยฺย โถมนํ ปสํสํ เอวเมว
โข ภนฺเต นาคเสน เทสนาคโต ปญฺโห อนุจฺฉวิกาย วิภตฺติยา วิภตฺโต เอวเมตํ
ตถา สมฺปฏิจฺฉามีติ ฯ

อุทกสฺส สตฺตชีวปญฺโห ปญฺจโม ฯ

ภนฺเต นาคเสน ทิสฺสนฺติ โลเก พุทฺธา ทิสฺสนฺติ ปจฺเจกพุทฺธา ทิสฺสนฺติ
ตถาคตสาวกา ทิสฺสนฺติ จกฺกวตฺติราชาโน ทิสฺสนฺติ ปเทสนาชาโน ทิสฺสนฺติ เทวมนุสฺสา
ทิสฺสนฺติ สธนา ทิสฺสนฺติ อธนา ทิสฺสนฺติ สุคตา ทิสฺสนฺติ ทุคฺคตา ทิสฺสติ ปุริสสฺส

อิตฺถีลิงฺคํ ปาตุภูตํ ทิสฺสติ อิตฺถิยา ปุริสลิงฺคํ ปาตุภูตํ ทิสฺสติ สุกฏทกฺกฏํ กมฺมํ ทิสฺสนฺติ
กลฺยาณปาปกานํ วิปากกูปโภคิโน สตฺตา อตฺถิ โลเก สตฺตา อณฺฑชา ชลาพุชา สํเสทชา
อุปปาติกา อตฺถิ สตฺตา อปทา ทฺวปฺปทา จตุปฺปทา พหุปฺปทา อตฺถิ โลเก ยกฺขา
รกฺขสา กุมฺภณฺฑา อสุรา ทานวา คนฺธพฺพา เปตา ปิสาจา อตฺถิ กินฺนรา มโหรคฺคา
นาคา สุปณฺณา สิทฺธี วิชฺชาธรา อตฺถิ หตฺถี อสฺสา คาโว มหิสา โอฏฺฐา คทฺรภา
อชา เอฬกา มิคา สูกรา สีหา พฺยคฺฆา ทีปี อจฺฉา โกกา ตรจฺฉา โสณา สิงฺคาลา
อตฺถิ พหุวิธา สกุณา อตฺถิ สุวณฺณํ รชฏํ มุตฺตา มณิ สํโข สิลา ปวาฬํ โลหิตงฺโค
มหาสารคลฺลํ เวฑุริโย วชิรํ ผลิกํ กาฬโลหํ ตามฺพโลหํ รชฏโชหํ กํสโลหํ อตฺถิ โขมํ
โกเสยฺยํ กปฺปาสิกํ สาณํ ภงฺคํ กมฺพลํ อตฺถิ สาลิ วีหิ ยโว กงฺคุ กุทฺรูโส วรโก
โคธุโม มุคฺโค มาโส ติลํ กุลตฺถํ อตฺถิ มูลคนฺโธ สารคนฺโธ เผคฺคุคนฺโธ
ตจคนฺโธ ปตฺตคนฺโธ ปุปฺผคนฺโธ ผลคนฺโธ ปพฺพคนฺโธ อตฺถิ ติณ ลตา คจฺฉ รุกฺข
โอสธิ วนปฺปติ นทีปพฺพต สมุทฺท มจฺฉ กจฺฉปา สพฺพํ โลเก อตฺถิ ฯ ยํ ภนฺเต
โลเก นตฺถิ ตํ เม กเถหีติ ฯ ตีณิมานิ มหาราช โลเก นตฺถิ ฯ กตมานิ
ตีณิ ฯ สเจตนา วา อเจตนา วา อชรามรา โลเก นตฺถิ สงฺตารานํ นิจฺจตา นตฺถิ
ปรมตฺเถน สตฺตูปลทฺธิ นตฺถิ ฯ อิมานิ โข มหาราช ตีณิ โลเก นตฺถีติ ฯ สาธุ
ภนฺเต นาคเสน เอวเมตํ ตถา สมฺปฏิจฺฉามีติ ฯ

โลเก นตฺถิภาวปญฺโห ฉฏฺโฐ ฯ

ภนฺเต นาคเสน อตฺถิ อรหโต สติสมฺโมโสติ ฯ วิคตสติสมฺโมสา มหาราช
อรหนฺโต นตฺถิ อรหนฺตานํ สติสมฺโมโสติ ฯ อาปชฺเชยฺย ภนฺเต นาคเสน อรหา
อาปตฺตินฺติ ฯ อาม มหาราชาติ ฯ กสฺมึ วตฺถุสฺมินฺติ ฯ กุฏิกาเร มหาราช วิกาเล
กาลสญฺญาย ปวาริเต อปริวาริตสญฺญาย อนติริตฺเต อติริตฺตสญฺญายาติ ฯ ภนฺเต นาคเสน
ตุมฺเห ภณถ เย อาปตฺตึ อาปชฺชนฺติ เน ทฺวีหิ อากาเรหิ อาปชฺชนฺติ อนาทริเยน
วา อชานเนน วาติ ฯ อปิ นุ โข ภนฺเต อรหโต อนาทริยํ โหติ ยํ อรหา อาปตฺตึ
อาปชฺชตีติ ฯ น หิ มหาราชาติ ฯ ยทิ ภนฺเต นาคเสน อรหา อาปตฺตึ อาปชฺชติ
นตฺถิ จ อรหโต อนาทริยํ เตนหิ อตฺถิ อรหโต สติสมฺโมโสติ ฯ นตฺถิ มหาราช
อรหโต สติสมฺโมโส อาปตฺติญฺจ อรหา อาปชฺชตีติ ฯ เตนหิ ภนฺเต นาคเสน มํ สญฺญาเปหิ
กึ ตตฺถ การณนฺติ ฯ เทฺวเม มหาราช กิเลสา โลกวชฺชญฺจ ปณฺณตฺติวชฺชญฺจาติ ฯ